Subling gipamatud-an sa Pilipinas ug Japan ang ilang pasalig nga mapalig-on pa ang kooperasyon sa depensa ubos sa ilang “Comprehensive and Strategic Partnership.”
Atol sa miting, gipahayag ni Defense Secretary Gilberto Teodoro ang tinguha nga ipadayon ang suod nga koordinasyon sa Japan basi sa lig-on nga pagsalig ug ang tumong sa pagpalambo sa usa ka “Free and Open Indo-Pacific.”
Gipasiugda sa duha ka opisyal ang nagkadako nga kooperasyon sa lebel sa institusyon ug operasyon, lakip ang pag-apil sa Japan sa Exercise Balikatan 41-26 nga gipangulohan sa Pilipinas ug Estados Unidos.
Samtang, nagtuo usab si Teodoro nga ang posibilidad nga ang relasyon sa Pilipinas ug China mahimong mas suod sama sa kasamtangang relasyon tali sa Pilipinas ug Japan nagdepende sa direksyon nga sundon sa gobyerno sa China.
Sumala ni Teodoro, ang Pilipinas walay problema sa mga lungsuranon sa China. Ug matod niya nga ang hagit anaa sa mga palisiya ug aksyon sa gobyerno sa China, nga iyang giingon nga adunay kaugalingong paagi sa internasyonal nga komunidad ug dili kanunay mosunod sa mga lagda ug panan-aw nga gisunod sa daghang mga nasud.
