Gikumpirma ni President Ferdinand Marcos Jr. ang kaandam sa Pilipinas ug Poland nga magsugod sa negosasyon alang sa usa ka kasabutan sa extradition.
Matod sa Presidente, nagpadayon ang pagpalig-on sa legal nga kooperasyon tali sa duha ka nasod human sa pagpirma sa mga kasabutan bahin sa pagbalhin sa mga nahukman na ug mutual legal assistance o tinabangay sa legal nga mga butang kalabot sa mga kasong kriminal.
Atol sa presentasyon sa mga kasabutan, gihatagan og gibug-aton sa Department of Justice o DOJ ug Ministry of Foreign Affairs sa Poland ang mutual legal assistance sa mga kasong kriminal.
Tumong niini nga mapalig-on ang panagtinabangay sa pagpugong ug pagsumpo sa krimen, lakip ang pagpalambo sa legal nga tabang ug kooperasyon sa mga proseso sa kriminal.
Sumala kang Marcos, ang gibanabanang 25,000 ka Pilipino nga nagpuyo sa Poland usa sa mga mahinungdanong pundasyon sa lig-on nga relasyon tali sa duha ka nasod.
