CEBU CITY-Kasagmuyo ang gibati sa pipila ka grupo sa Sugbo sa administrasyong Marcos, human sa State of Nation Address ni President Ferdinand “Bongbong” Marcos Jr.
Sa pakighinabi sa Bombo Radyo Cebu kang BAYAN Central Visayas Chairperson Jaime Paglinawan, gipaambit niini nga sigurado nga aduna’y kausaban ubos sa Marcos Jr. ug Sara Duterte Administration, apan dili alang sa kaayohan.
Kini gumikan kay padayon nga nag-antos ang katawhang Pilipino ubos sa Administrasyon ni Marcos Jr. samtang padayong giuna niini ang personal nga interes kaysa tinuod nga panginahanglan ug gipangayo sa masa.
Dugang niini nga ang sektor sa transportasyon pabiling giataki tungod kay ang modernisasyon alang sa interes sa mga dagkong negosyo nga tycoon mas giuna kay sa panginahanglan sa pampublikong transportasyon.
Gani, laing kapakyasan, matod sa grupo, gumikan sa pagsulbad sa nagkataas nga presyo sa mga batakang palaliton imbes sa gisaad nga 20 pesos matag kilo nga bugas, mitriple na hinuon ang presyo sa bugas sa nasud.
Subay niini, dungan sa ikatulong SONA sa Presidente kay ang BAYAN Central Visayas kauban ang Sugboanong Mamumuo nga Nagkahiusa alang sa Living o SANA-ALL (Cebuano Workers United for Living) nagpahigayon og mass mobilization.
