Giangkon si Department of Justice (DOJ) Secretary Jesus Crispin “Boying” Remulla nga ang padayong paggamit sa mga indibiduwal nga masakpan sa ilegal nga kalihukan sama sa kara krus o street gambling isip ‘quota filler’ nagpabiling dakong problema sulod sa kapulisan.
Matod ni Remulla, gihimo kini aron mapalambo ang ilang accomplishment reports nga giingong gi-report sa mga pulis ngadto sa ilang superyor.
Gihimo sa opisyal ang pamahayag isip tubag sa interpelasyon o pagpangutana ni Akbayan Party-list Representative Percy Cendaña, taliwala sa nagpadayon nga budget deliberation sa House Appropriations Committee for the Department of Justice (DOJ).
Sumala pa ni Remulla nga ning panahona wala pa silay nakuha nga espisipiko ug konkretong datos kung pila ang mga tawo nga nadakpan ug nasikop sa kapolisan tungod lang sa pagpusta sa kara krus o sa susamang matang sa sugal sa kadalanan.
Apan kusganon niyang giangkon nga kining maong sistema sa pagpanakop gitugot ug gipatuman pa sa pipila ka kurakot nga mga sakop sa kapolisan nga maoy hinungdan sa kabalaka sulod sa DOJ.//
Gumikan niini, gipasalig ni Remulla nga iya na usab nga ipasaka ug hisgotan ang maong sensitibong isyu uban ni PNP Chief Jose Melencio Nartatez.
