CEBU CITY-Nipadayag sa iyang kasagmuyo sa kapakyasan ni Presidente Ferdinand “Bongbong” Marcos Jr. ang lider sa Pagkakaisa ng mga Samahan ng Tsuper at Operator Nationwide (PISTON) Ceb Chapter sa umaabot nga SONA niini ugmang adlawa.
Mao kini ang gitumbok ni Greg Perez, ang lider sa PISTON Cebu, nga wala nitanyag si Marcos og solusyon sa mga problema sa sektor.
Bisan pa, ang gobyerno nagpabilin nga determinado nga i-phase out ang tradisyonal nga mga jeepney, nga nagtakda og upat ka mga deadline alang sa pagkonsolida.
Matod niya, hangtod karon wala pay nakitang solusyon ang administrasyon alang sa PUV modernization program (PUVMP).
Dugang ni Perez nga wala siya magtuo nga walay gahum ang Presidente sa pagsulbad sa krisis sa lana karon, tungod kay si Marcos Jr., nakapaus-os sa presyo sa imported nga bugas pinaagi sa executive order.
Nagtuo si Perez nga susamang aksyon ang mahimo sa presyo sa lana.
Karong Lunes, Hulyo 22, sa ikatulong State of the Nation Address (SONA) ni Marcos Jr., ipaabot sa PISTON ang mga isyu kalabot sa depekto nga modernization program ug Oil Deregulation Law, nga wala pa matubag sa administrasyon.
