Nagpasidaan sa mga senador si Philippine National Police (PNP) Chief General Melencio Nartatez Jr. kabahin sa mga legal nga sangputanan kung mapamatud-an nga sila nagtabang kang Senador Ronald “Bato” dela Rosa nga makalikay sa balaod.
Kini ang pahayag sa hepe sa nasudnong pulisya sa dihang gipangutana kung unsa ang aksyon sa PNP kung mapamatud-an nga adunay mga magbabalaod nga nagtago o nagtabang kang Dela Rosa nga makalikay sa mga awtoridad.
Nisanong kini sa dihang gipangutana kung ang mga magbabalaod nga iyang gihisgutan mao ba ang mga kauban ni Dela Rosa sa Majority Bloc.
Dugang niya nga ilang gipadala ang mga resulta sa imbestigasyon ngadto sa Department of Justice (DOJ) alang sa pagrepaso sa mga piskal, samtang ang PNP nagtigom og dugang nga ebidensya.
Mahinumduman nga ang PNP-Criminal Investigation and Detection Group (PNP-CIDG) nagsang-at na og reklamo nga obstruction of justice batok kang Senador Robin Padilla ug lima pa ka mga indibidwal. Kini may kalabotan sa giingong pag-ikyas ni Dela Rosa gikan sa Senate building sa sayong kaadlawon sa Mayo 14.
Sumala sa CIDG, dili layo sa pagdugang sa mga ngalan nga nalambigit sa kaso depende sa resulta sa ilang nagpadayon nga imbestigasyon.
