Padayon karun nga gi-verify sa Philippine National Police (PNP) ang posibilidad nga ang mga patayng lawas sa kapin sa 100 ka nawala nga mga sabungero, posibleng wala gilabay ug gilubong sa Taal Lake.
Matod ni PNP Chief PGen. Nicolas Torre III, padayon pa nga gi-verify ang impormasyon, diin adunay nag-ingon nga ang mga sabungero, gisunog, samtang ang uban gidudahan nga nalubong sa yuta.
Matod sa hepe, posibleng dili lang ang Taal Lake ang disposal site nga gigamit alang sa mga lawas sa mga sabungero, busa, ilang gisusi ang mga partikular nga lugar nga posibleng gilabayan sa ubang mga sabungero.
Subay niini, ang hepe nagdumili sa paghingalan sa mga lugar nga ilang gihimo nga verification aron masiguro nga dili masabotahe ug madaot ang ilang imbestigasyon ug pagpangita og igong ebidensiya nga makasuporta ug makapalig-on sa mga pamahayag ni alyas ‘Totoy.
Bisan pa man nga giangkon sa hepe nga lisod pangitaon ang mga patay’ng lawas, gipasalig gihapon ni Torre nga gihimo sa National Police ang tanan nilang mahimo aron masiguro nga ang mga nagpaluyo sa krimen madala sa hustisya ug manubag.|Bombo Irene Ardiente
