Giklaro ni Pasay City Police Chief PCol. Joselito De Sesto nga ang ilang police mobile nga mibiya sa Senado niadtong sayo sa Huwebes, Mayo 14, dili kabahin sa bisan unsang convoy o escort.
Kini human niya gikumpirmar nga siya mismo ang nagsakay sa puti nga police mobile nga mibiya sa Senado mga alas 3:00 sa kaadlawon niadtong Huwebes.
Nahitabo ang insidente pipila ka minuto human gikataho nga mibiya sila si Senador Ronald “Bato” dela Rosa ug Senador Robin Padilla sa Senate compound.
Giinsistir ni De Sesto nga ang ilang presensya sa lugar kabahin sa usa ka lehitimong operasyon sa kapulisan.
Matod niya nga ‘coincident’ lang nga mibiya sila sa usa ka itom nga van sa susamang oras ug wala silay koneksyon o koordinasyon sa mga sakay niini.
Dugang pa sa opisyal nga lahi ang ilang direksyon tungod kay ang van paingon sa World Trade Center samtang ang mga pulis mibalik sa estasyon.
