Nagpadangat og mga pag-ampo si Pope Leo XIV alang sa tanang Pilipino nga naapektuhan sa linog nga adunay gikusgon nga 7.8 magnitude nga miigo sa baybayon sa Sarangani sa miaging semana, nga mikalas og 61 ka kinabuhi.
Sa usa ka mensahe pinaagi sa iyang account sa X (kanhi Twitter), gipahayag sa Santo Papa ang iyang pakig-uban sa pag-ampo alang sa mga biktima ug sa ilang mga pamilya, ingon man sa mga nasamdan ug sa tanang nagpadayon sa pag-antos tungod sa maong katalagman.
Kahinumduman nga ang kusog nga linog nga miigo sa pipila ka bahin sa Mindanao niadtong Hunyo 8 nakamugna og grabeng kadaot.
Base sa pinakabag-ong datos gikan sa Office of Civil Defense (OCD), miabot na sa 61 ang ihap sa mga nakalas—54 gikan sa Rehiyon 12 ug pito gikan sa Rehiyon 11.
Natala usab ang kinatibuk-ang 5,200 ka aftershocks nga may gikusgon nga magnitude 1.2 hangtod 6.4. Sa maong gidaghanon, 1,307 ang opisyal nga natala samtang 76 ang nabati sa publiko.
Gumikan sa grabeng kadaot nga gipahinabo sa linog, gideklarar nga ubos sa state of calamity ang Sarangani ug General Santos City.
