CEBU – Nanawagan si Anne Ariosa, presidente sa Carbohanong Alyansa, nga unta dili idayon ang pagmodernize sa Carbon Public Market ug dili idayon ang demolition gumikan walay court order.
Gani, nagkanayon si Ariosa nga disadvantageous sa habig sa Cebu City Government ang maong proyekto sa pag-modernize sa merkado.
Nakapangutana usab kini kung asa na ang baruganan ni Cebu City Mayor Mike Rama diin kaniadto pabor man ang opisyal nga dili idayon ang pagmodernize sa Carbon apan karon nausab ang baruganan niini.
Nasayran nga ubay-ubay na sa mga vendors ang gipang-demolish sa may Sitio Pig Vendor ug sa War Wick Barracks sa may Freedom Park ug nabalaka ang mga tindera nga basin mawad-an sila og pwesto gumikan dugay ra silang nibalhin sa interem market.
Apan, sa habig ni Cebu City Vice-Mayor Raymond Garcia, nagkanayon kini nga ang gibuhat sa local government alang ra usab sa kaayohan dili lang sa mga mamalitay kundili lakip na sa tanang tindera sa Carbon Public Market gumikan sa pipila ka tuig nga nilabay wala gayud kini mausab diin nagpabilin gihapon kining hugaw, baho, lapok ug baha kung mag-uwan.
