PAKISTAN — Nahugyaw ang publiko sa usa ka press briefing sa mga pulitiko sa dihang wala nila mabantayan nga naka-on ang “cat filter” sa video.
Gi-live streaming ang presscon sa mga opisyal sa provincial government sa Khyber Pakhtunkhwa aron ipahibalo ang ilang mga mahinungdanong desisyon sa provincial cabinet.
Apan gikataw-an na lang sa mga viewers ang maong seryoso nga live streaming sa dihang kalit lang nga nakabaton og dalunggan ug ilong sa iring ang pulitikong si Shaukat Yousafzai ug uban pang mga opisyal.
Wala gayud mabantayi sa social media team ang maong eksena sa live streaming tungod lang sa naka-on nga cat filter.
Gitangtang nila dayon ang live streaming ug nangayo dayon og pasaylo ang representante ni Yousufzai sa maong panghitabo.
Nagkanayon ang pamahayag sa kampo ni Yousufzai nga usa lang ka human error ang maong panghitabo.
