CEBU CITY- Nadakpan na atol sa Hot Pursuit Operation sa kapulisan ang giilang prime suspek sa brutal nga pagpatay sa usa ka 46-anyos nga lalaki nga tig-atiman sa mga manok pang-derby sa usa ka farm sa Barangay Pung-ol Sibugay, dakbayan sa Sugbo.
Sa eksklusibong pakighinabi sa Bombo Radyo Cebu, gikumpirma ni Police Captain Ceasar Parcon, hepe sa Malubog Police Station 12, nga nadakpan ang suspek nga giila sa alyas “Jojo” atol sa hot pursuit operation didto sa Barangay San Nicolas, dakbayan sa Sugbo, kagahapong adlawa, Agosto 28.
Matud pa ni Capt. Parcon, una silang nakadawat og report bahin sa usa ka patay’ng lawas nga nasaksihan sa lugar, hinungdan nga misusi ang kapulisan ug didto nausab nasuta nga tinud-anay kini nga krimen.
Gikan sa imbestigasyon, napamatud-an nga upat ka tawo ang kuyog sa biktima sa wala pa kini makit-i nga wala nay kinabuhi.
Gipalapdan dayon sa kapulisan ang ilang operasyon ug didto natumbok si Jonathan Fortuna Leoligao, alyas “Jojo”, 44-anyos, nga usa sa lima ka suspek nga gihulagway nga mga co-caretaker usab sa farm.
Sumala pa sa hepe sa kapulisan, klaro sa ilang imbestigasyon nga tinuyo ang maong pagpatay nga ilang giingong giplano ug gilambigit sa tanang lima ka suspek.
Ang uban pa nga suspek nadakpan na usab ug anaa na sa kustodiya sa Malubog Police Station 12, gawas lamang sa 15-anyos nga menor de edad nga suspek nga kasamtangang giatiman sa DSWD.
Una na nga nakit-an ang lawas sa biktima nga si Jovani Bonghanoy, alyas “Bani”, nga nadugta ug nanimaho, adunay samad sa liog, giputos sa sako ug gilubong sa mabaw nga lubnganan sa farm.
Nakig-uban usab ang Bombo Radyo Cebu sa ocular inspection sa aktuwal nga crime scene uban ni Police Lieutenant Maria Theresa Macatangay, Deputy City Director for Operations, nga nanawagan sa mga residente sa dakbayan nga magsalig ug moduol sa kapulisan kung adunay kasaypanan o kalit nga panghitabo sa ilang lugar.
