Gipahayag ni Atty. Rameses Victorius Gatchalian Villagonzalo, ICC Accredited Lawyer, sa Bombo Radyo Cebu nga sa ika-16 nga adlaw sa impeachment trial batok kang Vice President Sara Duterte, mas gipatin-aw sa prosecution panel ang giingong improper o illegal nga paggamit sa confidential funds.
Matud pa ni Atty. Villagonzalo, ma-summarize ang nahitabong pag-examine sa prosecution sa ilang hostile witness nga si Gina Acosta, ang Special Disbursement Officer sa Office of the Vice President, diin gipagawas ang mga kritikal nga detalye sa pondo.
Naglakip kini sa pag-issue sa tseke gikan sa OVP, pag-clear ug pag-in cash niini sa bangko, pagbutang sa kwarta sa upat ka bag diin nagpatabang pa sila og karga pabalik sa opisina, hangtod sa pagtugyan ni Acosta, isip accountable officer, sa pondo nga nagkantidad og ₱125 million ngadto sa ilang security officer nga si Col. Raymund Dante Lachica imbes nga siya mismo ang modumala ug mogasto niini.
Gipatin-aw usab sa abogado nga tungod kay si Acosta giisip nga usa ka hostile witness o sakop sa kampo sa depensa, napugos kini sa pagtubag sa mga leading questions diin migawas ang mga detalye ug iregularidad sa paghawid ug paggamit sa pondo.
Dugang pa niya, bisan paman kon aduna puy political considerations o uban pang ebidensya bahin sa posibleng pagpalagpot sa Bise Presidente, nakatutok ug nakapundar gyud og maayong argumento ang prosecution bahin sa giingong iregular ug ilegal nga paggasto sa confidential funds.
Gipatin-aw usab ni Atty. Villagonzalo ang iyang mga obserbasyon bahin sa testimonya ni Acosta, diin matod niya, dako ang iyang pagtuo nga “atik-atik” o estratehiya ra ang gipakitang kalisod ug pagka-naive ni Acosta sa pagtubag sa mga pangutana gamit ang Tagalog ug English.
Gipasiugda ni Atty. Villagonzalo nga labing maayo unta kon gipangutana ang educational background sa witness, tungod kay isip usa ka SDO nga naghawid ug nagdisburse og ginatos ka milyon nga pondo, supisyente ug taas gyud ang kredensyal ug katakos nga gipangayo sa maong posisyon, nga kasagaran gitahasan ngadto sa mga degree holder, CPA, o abogado.
Dugang pa niya, dili kaayo katuhoan nga ang usa ka opisyal nga nagdumala sa ingon kadakong pondo kay maglisod lang sa pagkasabot o pagtubag sa pormal nga pinulongan, diin ang iyang gipakitang lihok sa hearing labaw pa nga usa ka pagpakaaron-ingnon o “playsafe” lang sa iyang bahin.
