Gibutyag ni House Prosecutor ug Bicol Saro Party-list Rep. Terry Ridon nga aduna silay gihuptang bag-ong ebidensya batok kang Vice President Sara Duterte, kini labot sa mga kabtangan nila sa iyang bana nga giingong wala gideklara sa iyang Statement of Assets, Liabilities, and Net Worth (SALN) gikan sa tuig 2007 hangtod 2024.
Atol sa paglusad sa “Bantay Impeachment” sa Claret School, gipahayag ni Ridon nga ang maong mga kabtangan narehistro sa mga ahensya sa gobyerno apan hingpit nga wala makita sa mga gisumiteng SALN sa Bise Presidente.
Ang maong bag-ong ebidensya gamiton aron lig-onon ang reklamo bahin sa “unexplained wealth” o wala ikapatin-aw nga bahandi, nga usa sa upat ka mga basehan sa impeachment nga giatubang ni Duterte.
Gipasabot ni Ridon nga ang mga dokumento wala pa mapresentar sa mga miaging pagdungog sa Kamara, busa maisip kini nga bag-ong ebidensya nga pormal nga ilakip sa pretrial brief nga isumite sa Senado sa sunod semana.
Matud niya, walay balaod nga nagdili sa prosekusyon sa pagpresentar og bag-ong ebidensya sa dili pa matapos ang pretrial stage.
Gawas sa isyu sa bahandi, nag-atubang usab si VP Duterte og mga reklamo sa korapsyon, sayop nga paggamit sa pondo sa publiko, ug mga hulga sa kinabuhi batok sa mga taas nga opisyal sa nasod.
