PROVINCE OF BOHOL- Giimbestigahan karon sa kapulisan ang usa ka duty police sa lungsod sa Guindulman, Bohol human gireklamo sa usa ka American citizen nga mi-alegar nga gipanghulga ug gisukmag siya samtang nag-uban sa iyang asawa nga nagkugos sa ilang 5-bulan nga anak.
Base sa impormasyon nga nadawat sa Bombo Radyo, nahitabo ang insidente pasado alas 3:30 sa hapon niadtong Domingo, Agosto 11, samtang nagmaneho ang biktima ug iyang asawa sakay sa motorsiklo padulong sa Public Market sa Poblacion, Guindulman, Bohol.
Matod sa magtiayon nga biktima, ilang naagian ang usa ka pulis nga nagpatuman sa Oplan Sita, ug gipahunong sila tungod kay wala sila nagsul-ob og helmet.
Giangkon nila nga ilang yawe sa motorsiklo gitangtang nga walay pagtugot, ug gipanghadlok sila gamit ang daghang mga dili maayo nga pulong samtang ang pulis naggunit sa iyang armas.
Gipahayag pa sa reklamo nga ang foreign national gitukmod ug gisukmag sa maong pulis, samtang gihulga usab ang iyang asawa bisan pa nga kini nagkugos sa ilang bata.
Sa imbestigasyon nga gihimo ni PMSg Rodelio Zamora ug PSSg Sherwin Salada sa Guindulman Police Station, wala na sa lugar ang suspetsadong pulis pag-abot sa mga otoridad. Apan giluwatan dayon sa mga biktima ang ilang pormal nga reklamo.
Tungod sa seryosong akusasyon, giandam na ang kasong Grave Threats batok sa suspetsado ubos sa pamuno ni PCapt. Exelsis Belciña.
Samtang si Bohol PPO Provincial Director PCOL Arnel Balagat Banzon misugo sa Provincial Investigation and Management Unit (PIDMU) sa pagpahigayon og pormal nga imbestigasyon.
Epektibo Agosto 12, gipabalhin ang suspetsado ngadto sa Provincial Personnel Holding and Accounting Section (PPHAS) sa Camp Francisco Dagohoy, Tagbilaran City. Gikuhaan usab kini sa iyang mga issued firearms.
Sa iyang pamahayag, gibadlong ni PCol Banzon ang tanang miyembro sa kapulisan nga kinahanglan sundon ang PNP Operational Procedures, ilabina sa pagrespeto sa tawhanong katungod sa tanang operasyon. Giklaro niya nga andam siya nga pasakaan og kasong administratibo ug kriminal ang bisan kinsang pulis nga molapas sa saktong pamatasan.
Sa laing bahin, si PLTCOL Norman Lobriga Nuez, tigpamaba sa Bohol Police Provincial Office, mipadayag nga seryoso ang ilang buhatan sa pagpanalipod sa katawhan ug sa pagpatunhay sa kahusay ug kalinaw sa lalawigan.
