Cebu City-Saulogon sa ikaduhang tuig sa dakbayan sa sugbo ang Red lantern Festival agig pagsaulog sa Bag-ong Tuig sa China o Chinese new Year.
Kung diin lauman karung adlaw nga sabado Pebrero 10 ang nagkadaiyang mga pasundayag sa Plaza Sugbo susama sa lion dance ug dragon dance.
Kini ang gipahibalo ni Cebu City Councilor Jocelyn Pesquera, chairperson sa Committee on Tourism, kinsa nidapit sa mga Sugbuanon sa pagduyog ug pagsaksi sa talagsaong kalihokan.
Matud ni Pesquera nga ang lineup sa mga kalihokan, mao ang parada nga salmotan sa Chinese fire brigade nga magsilbing marshal.
Uban ang mga iladaong pamilya sa dakbayan, nga magdala sa ilang kaugalingong mga banners.
Matud pa ni Pesquera nga sundan kini sa tradisyonal nga Lion and Dragon Dance diin ilado ang pagsaulog sa Chinese New Year.
Magsugod ang programa sa alas 5 sa hapon, diin lain-laing mga pasundayag ang gikatakda nga ipakita sa lain-laing mga eskwelahan sa palibot sa siyudad.
Gawas sa selebrasyon, tugutan ang mga estudyante nga libre nga makasulod sa Chinese Museum nga abli alang sa viewing.
Gipasiugda ni Pesquera nga abli ang maong kalihukan alang sa tanan bisan pa niadtong walay dugong Chinese.
Ang maong kalihukan pagatak-upan sa fireworks display.
