Nihatag og katin-awan ang City Environment and Natural Resources Office (CENRO) sa Lapu-Lapu City kabahin sa reklamo sa mga residente sa Vistamar, Barangay Soong 1, may kalabotan sa giingong temporary garbage storage area nga giingong adunay isog nga baho ug nakaapekto sa kahimtang sa palibot.
Matod ni Jocelyn M. Abayan, Officer-in-Charge sa CENRO Lapu-Lapu, dili kini temporary garbage storage area, kondili usa ka transfer station o Material Recovery Facility (MRF), diin diri gidala ang nakolektang basura aron i-segregate sa dili pa ihatod sa lungsod sa Consolacion.
Gipasabot ni Abayan nga nag-operate na ang maong pasilidad sulod sa 15 ka tuig isip kabahin sa solid waste management program sa syudad, nga nagtinguha sa pagpalambo sa sistema sa pagdumala sa basura.
Giklaro usab niya nga walay basura nga magdugay sa maong dapit, tungod kay adlaw-adlaw kini gihatod ngadto sa Consolacion.
Kabahin sa reklamo sa baho, miangkon si Abayan nga dili kini malikayan, apan nagpadayon ang ilang paningkamot aron maminusan kini ug dili makahatag og dakong epekto sa mga residente.
Lakip sa ilang gihimo ang adlaw-adlaw nga pag-spray og odor control solutions.
Dugang pa niya, ang operasyon sa pasilidad ginabuhat ubos sa giya sa Department of Environment and Natural Resources (DENR), ug nakasunod sa tanang gikinahanglang regulasyon. Nagpadayon usab ang regular nga inspeksyon sa ahensya aron masiguro ang pagsunod sa mga pamalaod.
Una niini, midangop sa Bombo Radyo Cebu ang mga residente sa maong lugar aron ipadayag ang ilang reklamo batok sa grabeng baho nga, matod pa nila, mosulod na sa ilang mga panimalay.
Sa pag-ronda sa Bombo Radyo Cebu News Team, nasuta ang presensya sa mga dump truck nga puno sa basura nga nagtapok sa maong lugar.
Sumala sa mga residente, naglisod na sila sa pagpuyo ug pagpahuway tungod sa baho nga madala sa hangin.
Sa pagkakaron, nanawagan ang mga lumulupyo sa mas estrikto ug epektibong implementasyon sa waste management system aron masiguro ang limpyo ug luwas nga palibot sa ilang komunidad.
