Gikumpirma sa Department of Justice (DOJ) nga ang resolusyon sa kasong grave threats ug inciting to sedition batok kang Bise Presidente Sara Duterte kay gisusi pa pag-ayo.
Sumala sa tigpamaba sa DOJ nga si Atty. Polo Martinez, ang maong kaso adunay draft apan kini pagatun-an pa.
Ang kaso gikonsiderar nga pending tungod sa pagtuon sa mga division head sa DOJ.
Kahinumduman nga niadtong Pebrero 2025, ang National Bureau of Investigation (NBI) nagsang-at og reklamo tungod sa hulga nga gihimo ni Duterte niadtong Nobyembre 2024.
Sa maong pahayag, ang Bise Presidente miingon nga nagsuhol siya og tawo aron patyon si Presidente Ferdinand Marcos Jr., Unang Ginang Liza Marcos, ug House Speaker Martin Romualdez.
Giklaro ni Martinez nga bisan pa man og gideklara na ni Duterte ang iyang pagdagan pagka-presidente, ang maong kaso dili maapektuhan.
