Gisaway sa Russia ang plano sa European Union nga ipahulam sa Ukraine ang mga na-freeze nga asset sa Moscow.
Diin ang kantidad mokabat sa 210 bilyon nga Euros o katumbas kapin sa P15 trilyon.
Kadaghanan sa kwarta anaa sa bangko sa Belgium nga Euroclear diin kini gamiton alang sa pag-upgrade sa military sa Ukraine.
Human sa halos upat ka tuig nga gubat, nahutdan na og kwarta ang Ukraine, busa nagkinahanglan kini og mga 135 bilyon nga euros o katumbas sa kapin P9 trilyon sa sunod nga duha ka tuig.
Tungod niini, giakusahan sa Russia ang European Union sa pagpangawat.
Nagplano usab ang Russian Central Bank nga kasuhan ang bangko sa Belgium nga Euroclear tungod sa maong plano.
Mahinumduman nga ang EU ug Ukraine nagkauyon nga gamiton ang kwarta sa pagtukod pag-usab sa mga building nga nadaot sa kaylap nga pag-atake sa Russia.
