Nibuto ang usa ka drone sa Russia human kini mitugpa sa usa ka apartment building sa Romania, nga usa ka nasod nga sakop sa gamhanang military alliance nga North Atlantic Treaty Organization (NATO).
Sumala sa Romanian General Inspectorate for Emergency Situations, mibuto ang tibuok explosive payload sa maong drone nga maoy hinungdan sa dakong sunog sa bilding ug nikaangol sa duha ka tawo.
Samtang basi sa taho sa emergency services, gitambalan na ang duha ka residente nga nakaangkon og mga samad, samtang anaa sa 70 ka tawo ang luwas nga gipabakwit samtang gipalong ang sunog.
Nahitabo ang maong insidente gahapon, Biyernes, Mayo 29, sa silangang dakbayan sa Galati, nga nahimutang duol sa utlanan sa Ukraine.
Giila kini dayon sa Foreign Ministry sa Romania nga usa ka seryoso ug iresponsableng escalation gikan sa Russian Federation. Bisan og dili kini ang unang higayon nga adunay natagak nga drone sa Russia sa teritoryo sa usa ka miyembro sa NATO sulod sa kapin upat ka tuig nga gubat sa Ukraine, kini ang labing unang higayon nga adunay mga sibilyan nga naangol sa Romania.
Human sa insidente, nagpatawag dayon og emergency meeting si Romanian President Nicusor San sa Supreme Council of National Defense, diin nagpatuman ang konseho og mga dinalian nga lakang batok sa Russia.
Gideklara usab sa presidente sa Romania nga ang Russian Federation ang adunay bug-os nga tulubagon sa nahitabo.
Sa wala pa ang pagbuto, nagpadala na ang Romania og duha ka F-16 fighter jets aron bantayan ang ilang airspace human namatikdan ang pagsulod sa mga drone, ug nangayo na usab ang nasod sa mga kaalyado niini sa NATO og dugang anti-drone capabilities.
Sa pagkakaron, wala pa’y giluwatan nga pamahayag o komento ang bahin sa Russia kalabot sa insidente, nga gikondena sa NATO ug European leaders isip usa ka dayag ug seryosong paglapas.
