Giisa sa Kazakhstani player nga si Elena Rybakina ang iyang unang tropeyo sa US Open human niya gipildi si Aryna Sabalenka, sa iskor nga 6-4, 5-7, 6-2, sa women’s singles final sa Arthur Ashe Stadium.
Dili lang ang titulo ang nakuha ni Rybakina sa iyang kadaugan; nalangkat usab niya gikan kang Sabalenka ang No. 1 nga pwesto sa WTA rankings.
Nakabawi si Sabalenka human nakuha ni Rybakina ang unang set, apan gidominar sa Kazakhstani star ang deciding set ug sa katapusan gitapos ang duwa sa iskor nga 6-2.
Sa championship point, human sa usa ka double fault, daling nakabawi si Rybakina ug gisilyohan ang duwa pinaagi sa usa ka service ace.
Kini ang ikatulo nga Grand Slam title ni Rybakina ug ang ikaduha niya karong 2026; una na niyang gipildi si Sabalenka sa final sa Australian Open.
Samtang, natapos ang 99 ka semana nga paghupot ni Sabalenka sa pagka-world No. 1. Napakyas usab siya sa pagkab-ot sa “three-peat” o ikatulo nga sunod-sunod nga kadaugan sa US Open, human niya nakuha ang titulo niadtong 2024 ug 2025.
