CENTRAL VISAYAS-Sugdan na sa mga sakop sa kapulisan ang deployment alang sa Central Visayas Regional Athletic Association o kon CVIRAA karong umaabot nga Abril 30, 2024 subay sa tinguha nga luwas ug hapsay ang ipahigayon nga kalihokan diin maabot ang mga partisipante sa Mayo 1.
Sa pakighinabi sa Bombo Radyo Cebu Newsteam kang Police Col. Ireneo Dalogdog, ang City Director sa Cebu City Police Office diin gipambit niini ang ilang hingpit nga pagpangandam sa usa sa mga dakong kalihokan sa dakbayan sa Sugbo.
Gani, subay sa ilang pagpangdam adunay gitukod nga Multi-Agency Coordinating Center o MACC ang buhatan sa CCPO nga anaa sa ika-upat nga andana sa Social Hall sa City Hall.
Diin ang tumong nga ma-monitor ang tanang aktibidad ilabi na sa mga nagkadaiyang sports nga himoon atol sa CVIRAA.
Sa pikas bahin, gipaambit ni Dr. Salustiano Jimenez, ang regional director sa Department of Education Region 7 nga andam na ang Central Visayas sa ipahigayon nga CVIRAA 2024 diin matud niini nga padayon ang ilang pagtukod sa safety measures alang sa mga batang atleta ug sa tanang nalambigit nga mosalmot sa maong kalihokan./
Ingon man nga tungod sa nagpadayon gihapon nga renovation sa Cebu City Sports Center hinungdan nga nakahukom ang Cebu City Government nga mahitabo ang pag-abli sa kalihokan sa South Road Properties diin mipasalig ang kagamhanan sa Sugbo nga lakip sa ilang preparasyon ang epekto sa kainit sa panahon sa mga atleta.
