Pormal nga nipadala og suwat si Senate President Pro-Tempore Panfilo “Ping” Lacson kang Senate President Vicente “Tito” Sotto III aron moluwat sa katungdanan isip chairman sa Senate Blue Ribbon Committee nga nag-imbestigar sa mga anomalosong flood control projects.
Sa suwat nga gipadala ngadto kang Sotto, si Lacson niingon nga ang iyang pagluwat sa katungdanan tungod sa mga alegasyon ug kasagmuyo sa pipila ka mga senador sa direksyon sa imbestigasyon sa komitiba.
Matod ni Lacson, pipila ka mga kauban sa Senado ang niingon nga ang Blue Ribbon Committee daw gipunting sa pipila ka mga senador samtang giprotektahan kuno ang pipila ka mga miyembro sa Kamara nga nalambigit sa kontrobersiya sa mga flood control projects.
Gitataw sa senador nga pabiling patas ug walay gidapigan ang imbestigasyon nga gihimo sa iyang komite ug ang basehan niini kay ebidensiya ug kamatuoran lamang.
Dugang pa niya nga ang iyang mga aksyon isip pangulo sa komitiba kay walay konsiderasyon sa politika ug wala siyay plano nga modagan sa bisan unsang posisyon human matapos ang iyang termino sa 2031.
