Gikasuko ni Senador Joel Villanueva nga nahimo kining “punching bag” sa matag higayon nga adunay anomaliya sa flood control projects sa iyang lungsod sa Bulacan.
Gipanghimakak usab sa senador nga aduna siyay kalambigitan sa P600-million insertion sa unprogrammed funds sa 2023 national budget.
Gihimo sa Senador ang pahayag human gikumpirmar ni Senate President Pro Tempore Panfilo Lacson nga adunay magamit nga P600 milyon nga pondo alang sa mga proyekto sa Bulacan flood control projects sa 2023 nga wala giprograma nga budget.
Atol sa pag-ihap ni Lacson, nikabat sa pito ngadto sa walo ka mga butang nga nagkantidad og P75 milyones matag usa ug dunay kinatibuk-ang P600 milyones.
Kahinumduman nga unang gibutyag ni kanhi assistant district engineer sa Department of Public Works and Highways (DPWH) Brice Hernandez nga si Villanueva nangayo og 30 porsiyento sa P600-M insertion.
Nagtuo usab ang Senador nga adunay naningkamot nga mahugawan ang iyang pangalan sa 2028 elections.
Busa, nanawagan ang senador sa publiko nga dili motuo sa mga nagpakatap og fake news kalabot sa maong butang.
