Giangkon ni Senador JV Ejercito nga naguol siya sa dihang nakita niya pag-usab si kanhi Presidente Rodrigo Duterte atol sa status conference sa International Criminal Court (ICC) niadtong miaging Miyerkules.
Matod ni Ejercito, dugay na siyang wala makakita kang Duterte ug nakabantay siya og tataw nga kausaban sa kanhi presidente. Sumala sa senador, ang kanhi presidente morag nipis kaayo ug luya tan-awon, ug taas ang buhok niini.
Gibutyag ni Ejercito nga makapatandog alang kaniya ang maong panagkita tungod kay nakatrabaho na siya kaniadto uban kang Duterte, ilabi na sa mga proyekto sa imprastraktura sa miaging administrasyon.
Lakip sa mga proyekto nga iyang gihisgutan mao ang “Build, Build, Build” program, ang North-South Commuter Railway, ug ang Metro Manila Subway.
Apan, bahin sa kaso sa ICC batok kang Duterte, nagkanayon si Ejercito nga angay tugotan ang proseso sa hustisya nga modagan sumala sa angay niini.
