Mitubag si Senador Ronald “Bato” dela Rosa sa usa ka Kongresista nga mikuwestiyon sa desisyon sa Senado nga hatagan og asylum si dela Rosa kon gani moluwat og warrant of arrest ang International Criminal Court.
Matud ni Kabataan Partylist Representative Raoul Manuel nga ang institutional courtesy kay giingong sobra na nga gigamit.
Gitataw niya nga kon magtago-tago si Dela Rosa sa Senado bisan walay session, daw susama lang kini nga miangkon ang senador nga siya sad-an.
Sugyot ni Dela Rosa nga mag-senador una si Cong. Manuel aron madungog ni Senate President Francis “Chiz” Escudero ang iyang hangyo.
Kahinumdoman nga miingon si Escudero nga dili siya motugot nga makasulod ang mga awtoridad sa Senado aron dakpon si dela Rosa.
Kini kon mangayo og proteksiyon si dela Rosa ug magpabilin sa Senado sa higayon nga moluwat og warrant of arrest ang ICC batok kaniya.
Matod niya nga basi sa mga lagda ug praktis, dili tugotan sa Senado ang pagdakop sa bisan kinsa nga sakop niini sulod sa institusyon ma-sesyon man ang Kongreso o wala.
Gumikan niini, gipasalamatan ni Dela Rosa si Escudero sa iyang pagprotehir kaniya ug sa institusyon diin gibarogan ang husto.
Hinuon gipasalig sa senador nga dili hangtod sa hangtod ang iyang pagpabilin sa Senado kung ipagawas ang warrant of arrest batok kaniya.
