Giyagyag ni Senate President Pro Tempore Ping Lacson ang giingong relasyon ni kanhi Department of Public Works and Highways (DPWH) Secretary Manuel Bonoan sa usa ka contractor sa flood control projects sa Pampanga.
Sa iyang privilege speech sa plenaryo sa Senado, si Lacson niingon nga si Fatima Gay Bonoan-Dela Cruz, anak ni Bonoan, maoy treasurer sa MBB Global Properties Corp—usa ka kompanya nga gipanag-iya sa pamilya ni Candaba Mayor Rene Maglanque.
Matod sa senador, gipanag-iya sa MBB Global Properties Corp. ang dul-an P1-bilyones nga Wyndham Garden Hotel sa Clark, Pampanga.
Matud usab ni Lacson nga si Mayor Maglanque maoy pangulo sa pamilyang Maglanque nga nanag-iya sa Globalcrete Builders, usa ka contractor nga mikontrata og P2.195 bilyones nga kantidad sa flood control projects sa Bulacan gikan niadtong 2018 hangtud 2024.
Kaniadtong 2024, si Maglanque mismo ang mipirma sa daghang mga kontrata bisan kung gitangtang na niya ang iyang interes.
