Mangulo ang Archdiocese of Cebu ug ang civic group nga Sugboanong Pakigbisog Kontra Korapsyon (SuPaKK) sa bersyon niini sa lihok-protesta diri sa Sugbo isip paghandom sa ika-40 anibersaryo sa EDSA People Power Revolution karong Miyerkules, Pebrero 25, 2026.
Gitawag kini nilang SuPaKK 2.0 nga maoy ikaduhang bahin sa protesta sa katawhan batok kurapsyon ilabi na sa anomaliya sa flood control projects diin nagtapod sa kaping 60 ka mga grupo sa nagkalain-laing sektor sa pagtuo (faith-based), akademiko, kabatan-onan, ug uban pa.
Ang grupo magpahiayon og santos nga misa sa Basilica Minore del Santo Niño de Cebu Pilgrim Center inig ala-1:45 sa hapon pagasundan sa 1-minute simultaneous bell-ringing sa tanang mga simbahan sa archdiocese.
Sunod niini kay mu-martsa sila padulong Plaza Independencia sa Martial Law marker sa presentasyong giulohang “Panagtagbo” dayon sa usa ksa konsiyertong nagngalan og “Yukbo”.
Kahinumduman nga una nang gipanawagan sa Archdiocese of Cebu pinaagi sa pagpangulo ni Archbishop Alberto “Abet” Uy nga maghandom ang tanang Sugboanong Katoliko ilabi na sa mga kabatan-onan sa pagsalmot sa mga kalihukan para sa paghinumdum sa EDSA People Power sa rason nga nagtudlo kini sa kasaysayan og moralidad sa pagka-Pilipino.
