CEBU – Ipahigayon sa South Road Properties (SRP),ang Sinulog 2023 Grand Festival, apan ang mga lokal ug turista malingaw usab sa ubang kalihokan nga may kalambigitan sa Sinulog diha sa Osmeña Boulevard ug sa Plaza Independencia.
Kini ang gibutyag ni Sinulog Foundation Inc. (SFI) Executive Director Jojo Labella nga ang Sinulog Street Fair sa Osmeña Boulevard magsugod karong Disyembre 15, 2022.
Gawas sa street fair, aduna usab gabii nga mga pasundayag sa Plaza Independencia nga giandam sa Office of the Vice Mayor sanglit si Bise Mayor Raymond Alvin Garcia maoy chairman sa presentation cluster.
Kining matag gabii nga mga pasundayag sa Plaza Independencia gipaabot nga magsugod sa Enero 6, 2023, ang adlaw sa Sinulog Opening Salvo.
Gipahibalo usab ni Labella nga daghang higante ug float ang mosalmot sa mga contingent sa Sinulog atol sa Sinulog Grand Parade sa SRP.
