CEBU CITY-Nipasaka na og kaso ang Special Investigation Task Group (SITG) sa Cebu City Police Office adlaw nga Miyerkules, Agosto 21, 2024, batok sa tulo sa walo ka mga suspek sa pagpanulis sa duha ka mga tindahan sa alahas sa dalan Calderon, Barangay Ermita, dakbayan sa Sugbo, niadtong Agosto 8.
Personal nga midangop si Cebu City Acting Mayor Raymond Alvin Garcia sa Cebu City Prosecutors Office aron saksihan ang pagpasaka sa mga kaso ug tan-awon ang mga dokumento nga gisumiter sa SITG.
Ingon man nga gidayeg ni Garcia ang kapolisan nga makapasaka sila og kaso batok sa mga suspetsado sulod lang sa kapin usa ka semana sukad sa paghimo sa krimen.
Gihulagway ni Garcia nga lig-on ang mga ebidensiya sa kapolisan.
Ang gipasakaan og kaso mao sila si Marcial Pacol Ponesto alyas Jager, nga taga dakbayan sa Mandaue ug ang gihinganlan nga ‘Gab’ nga taga Barangay Poblacion, dakbayan sa Lapu-Lapu; ug police non-commissioned officer nga nadestino sa Luzon nga kasamtangang nag-abang og balay sa Purok Rose, Sitio Kalit, Barangay San Antonio-Jubay, Liloan, Cebu, apan lumad nga taga Metro Manila.
Ang maong polis gikatahong nanag-iya sa Mitsubishi Adventure nga gisakyan sa mga suspek nga narekober sa kapulisan niadtong Agosto 13 sa Zone Ahos, Barangay Paknaan, dakbayan sa Mandaue.
Matod ni Police Colonel Antonietto Cañete, ang acting chief sa Cebu City Police Office, tulo lang sa gitumbok nga mga suspek ang mag-atubang og kaso tungod kay resulta sa digital evidence examination, lakip na ang CCTV camera nga gisusi sa Regional Anti-Cybercrime Unit (RACU 7) nga kasamtangang pending pa.
Wala maapil sa kapolisan si Michael Obaob Puno alyas Mikmik kinsang gitumbok nga lookout tungod kay wala pa ibutyag sa RACU 7 sa publiko ang findings sa CCTV camera examination.
Nadakpan si Mikmik nga nagdala og ilegal nga drugas ug armas human niresponde ang mga operatiba sa Mabolo Police Station sa alarma sa armadong tawo niadtong Agosto 16.
Gawas sa kasong kriminal, mag-atubang usab og kasong administratiba ang pulis nga giingong nalambigit sa krimen.
Sa imbestigasyon nasayran nga nibakasyon ang maong polis ug gikatahong nia kini sa Sugbo atol sa pagpanulis sa twin jewelry robbery.
