CEBU CITY — Moabot sa 1,299 ka mga indibidwal gikan sa mga kalungsuran sa Amihanang Sugbo ang namasko sa ilang tagsa-tagsa ka mga evacuation centers atol sa paghaguros sa bagyong Ursula.
Nasinati sa mga residente sa Daanbantayan, Poro, San Francisco, Santa Fe, ug Madridejos ang kusog nga pagbundak sa uwan ug paghaguros sa hangin human gipaubos sa Signal #3 ang nahisgutang mga lugar kagabii.
Matud ni Rhee Telen Jr. sa Cebu Provincial Disaster Risk Reduction and Management Office nga mipahigayon daan ang mga Municipal Disaster Offices og pre-emptive evacuation alang sa kaluwasan sa mga residente.
Dugang pa ni Telen nga daghang mga punuan ang nangatumba gumikan sa kakusog sa hangin.
Nasinati usab sa mga northern Cebu ang halapad nga blackout atol sa paghaguros sa maong bagyo.
Nakig-alayon na karon ang Cebu PDRRMO sa Provincial Social Welfare and Development Office ug sa Department of Social Welfare and Development (DSWD)-7 alang sa relief operations ngadto sa mga apektado sa kusog nga bagyo.
Pagpangandam sa Camotes
Gisusi ni Tudela Mayor Jojo Solante ang lungsod sa Tudela sa pagtan-aw sa kahimtang sa panahon subay na sa bagyong Ursula.
Usa sa mga gitotokan sa disaster head ang duha ka barangay nga duol kaayu sa peligro ingon man ang mga mga coastal barangay.
Sigon pa ni Solante nakasinati na sila ug kusog-kusog nga uwan ug hinuon ug paghaguros sa hangin.
Adunay gipatuman usab nga pre-emptive evacuation ug force evacuation sa maong lugar.
Nagpahigayon usab sila ug rekorida kagahapong adlawa kuyog ang disaster head kabahin sa pagpangandam sa bagyong Ursula.
Hinuon wala may nagdumili sa gipatuman nga forced evacuation. (Lahvi Quiñones)
