CEBU CITY- Nadakpan sa gipahigayon nga hot pursuit operation sa kapulisan ang usa sa mga suspetsado sa pagpamusil ug pagpatay sa usa ka lalaki sa Sitio Lower Manol, Barangay Tisa, Cebu City niadtong adlawng Biyernes, Setyembre 12, 2025.
Ang nadakpan giila sa alyas nga “Kirby”, usa ka hamtong nga lalaki ug residente usab sa maong lugar.
Matud sa Labangon Police Station, si Kirby giingong usa sa duha ka lalaki nga mipusil sa biktima nga si Jason Garcia, 39 anyos, usa ka boarder sa Sitio Lower Manol ug bag-ong abot pa lang gikan sa Leyte.
Sa inisyal nga imbestigasyon sa kapulisan sa Labangon Police Station, naglingkod si Garcia sa hagdanan gawas sa ilang gipuy-an sa dihang niduol kaniya ang duha ka armadong lalaki.
Nakabantay ang biktima sa ilang dautang tuyo, hinungdan nga misulay kini sa pagdagan.
Apan, gigukod kini sa duha ka suspek, sa dihang naapsan gisumbag pa si Garcia sa mga suspetsado.
Human niini, gipusil siya sa ulo ug likod nga maoy hinungdan sa iyang hinanaling kamatayon.
Human sa krimen, dali nga misibat ang mga suspek, diin ang usa misakay pa og motorsiklo.
Sa pakighinabi sa Bombo Newsteam kang PCAPT Charisma Gonzales, ang tigpamaba sa Cebu City Police Office, gitino niini nga posibleng anggulo sa mistaken identity ang maong hitabo, sanglit adunay igsuon nga kaluha ang biktima nga kasamtangang napriso sa Cebu City Jail tungod sa kaso nga may kalabutan sa ilegal nga druga.
Gituohan nga nasayop og target ang mga suspek kang Garcia tungod kay bag-o pa kini nga miabot sa lugar.
Padayon ang imbestigasyon sa kapulisan samtang gipaninguha usab nilang mahibal-an ang tinuod nga motibo ug madakpan ang kauban ni “Kirby” aron makompleto ang kasayuran sa maong krimen.
