Nakakuha na og clearance ang Tourism Infrastructure and Enterprise Zone Authority (TIEZA) sa ilang pagahimuong restoration works sa Our Lady of the Pillar Parish sa lungsod sa Sibonga sa habagatang Sugbo human sa mga pagkalangay tungod sa mga rekisitos sa government oversight.
Kini ang gipahibalo ni TIEZA General Manager Mark Lapid atol sa iyang panagtagbo nila ni Cebu Provincial Governor Pamela “Pam” Baricuatro, Sibonga parish priest Fr. Jose Joey Belciña, ug Sibonga Budget Officer Edna Lorna Otero nga matod pa ang proyekto kay musulod na sa bidding stage sunod semana diin ang ilang ahensya maong lead implementer ug dili na ang kagamhanang lalawigan.
Sumala ni Lapid nga ang pagkalangay kay ang ilang pag-comply sa mga rekisitos inabagan sa National Historical Commission of the Philippines (NHCP) tungod kay heritage site ang simbahan sa Sibonga.
Ang maong simbahan kay gideklarar nga Level II historical site sa NHCP nga nakahiagom og mga kadaot niadtong Disyembre 2021 human sa pagkuso-kuso sa Bagyong Odette diin nangaguba ang atop, kisame, ug karaang rector niini.
Kahinumduman nga niadtong Enero 2025, ang Kapitolyo kay mipirma og P110-milyones nga restoration agreement sa TIEZA diin ang kagamhanang lalawigan ang lead implementer samtang ang nasudnong ahensya ang nagtagana sa pundo. Apan gi-flag kini sa Commission on Audit (COA) sa giisyu nga Audit Observation Memorandum ug Notice of Disallowance hinungdan sa pagpasiuli sa P99-milyones sa national treasury pag-Mayo 2025.
Ingon man nga gipamahayag ni Lapid nga ang pundo kay nahibalik na para sa proyekto sa ilang pakig-alayon sa Kapitolyo sa lokal nga kagamhanan sa Sibonga.
Sa iyang bahin, gihangop ni Baricuatro ang maong kalambuan nga gipadangat sa TIEZA sa pagpaayo sa simbahan sa Sibonga nga kung mahumana kay magtimaan sa ikaduhang major national funding package diri sa Sugbo diin ang una mao ang P700-milyones housing assistance sa mga biktima sa Bagyong Odette nga gikan sa National Housing Authority (NHA).
