CEBU CITY — Gipirmahan na ni Cebu City Mayor Edgardo Labella ang termination order batok sa casual employee sa Cebu City Hall kinsang nasikop atol sa buybust operation kagahapon.
Giila ang dinakpan nga si Robeth Sable Delos Santos, Administrative Aid III sa Department of General Services (DGS) sa nahisgutang buhatan.
Sa eksklusibong interview sa Bombo Radyo, gihulagway ni Labella nga usa ka pagpaka-uwaw ang pagkalambigit ni Delos Santos sa ilegal nga druga ingun man nga dakong sayop ang paggamit niini sa kahimanan sa Syudad sa Sugbo alang sa transaksyon sa illegal drugs hinungdan nga angayang palawman matud pa ang imbestigasyon aron mabalhog kini sa bilanggoan.
Nimando na usab kini nga lakip sa pa-imbestigaran ang department head sa DGS gumikan kay posibleng luag ang pagpatuman niini sa mga lagda ngadto sa mga trabahante ilabi na ang pagpagamit sa sakyanan sa City Hall.
Sugyot karon sa Mayor ngadto sa mga pangulo sa nagkadaiyang departamento sa lokal nga pangagamhanan sa Dakbayan sa Sugbo nga pahugtan pa ang pagpagamit sa mga kahimanan aron malikayan nga mahitabo ang susama nga binuhatan.
Sa kasamtangan, gi-mandoan na niini ang naa sa Human Resource aron sa pag-review sa record ni Delos Santos kung aduna ba kini kalambigitan kaniadto sa illegal drugs.
Giimug-atan niini nga bisan unsa pa man ang posisyon sa usa ka empleyado, wala kini katungod nga magpabilin sa City Hall kung mubuhat sa mga supak sa balaod.
Kahinumduman nga nasikop si Delos Santos kagahapon atol sa buybust operation diin nakuha gikan sa posisyon niini ang usa ka medium size sa gituhuang shabu nga adunay gibug-atong 100 gramos ug mo-balor sa P714,000.
