CEBU CITY-Nanginahanglan karon ang konseho sa dakbayan sa Sugbo nga mosumitir una og traffic plan ang contractor ug project manager sa Bus Rapid Transit kun BRT Project sa dili pa sila modesisyon sa sugyot nga mag 24 oras ang trabaho sa maong proyekto.
Kung diin , atol sa regular session sa Cebu CIty Council, giduso ni Konsehal Joy Pesquera ang resolusyon nga mohatag una og traffic plan ingon man precautionary measures aron masiguro nga walay mga pedestrian o motorista ang maaksidente kon ugali man magsugod sila sa pagtrabaho sa BRT Project Package 1 sulod sa 24 oras.
Kahinumduman nga ang Chinese company nga Hunan Road and Bridge Contruction Group nga contractor sa BRT Package 1 nihangyo nga motrabaho sila sa proyekto sulod na sa 24/7 diin gisegundahan kini sa Department of Transportation kun DOT nga gipirmahan ni BRT Project Manager Norvin Imbong.
Nirason ang contractor nga kinahanglan nila nga isubsub karon ang ilahang construction sa BRT Project aron mapaspasan kini ug mapagamyan ang impact sa proyekto ngadto sa komunidad samtang gibuhat ang maong proyekto.
Apan sigon ni Pesquera nga kinahanglan pa nga adunay masumitir nga mga plano ilabina sa trapiko aron dili mosamot ang epekto niini ngadto sa riding public.
Dugang usab ni Konsehal Nestor Archival nga gipangayuan usab nila og standard lighting plan ang contractor human nga gipangtangtang na ang streetlights sa maong dapit ug pwerte nang ngitngita ug basin unya adunay ma-disgrasya tungod niini.
