Gipahibalo sa usa ka korte sa Seoul nga gi-postpone ang petsa sa trial sa Presidente sa South Korea nga si Lee Jae-myung may kalabotan sa kaso nga iyang giatubang sa 2022 nga eleksyon.
Kini nahitabo human ang Korte Suprema sa South Korea mihukom niadtong Mayo nga si Lee mihimo og bakak nga mga pahayag samtang nagpapili pagka-presidente, apan ang kaso giablihan pag-usab human ang pipila ka mga grupo miapelar batok kang Lee.
Nasayran nga ang Seoul High Court gikatakdang magpahigayon og hearing sa Hunyo 18, 2025, apan ang usa ka tigpamaba sa korte miingon nga kini i-postpone, aron madesisyonan subay sa Artikulo 84 sa Konstitusyon sa nasod.
Sumala sa Artikulo 84 sa Konstitusyon sa South Korea, ang usa ka naglingkod nga presidente dili mahimong kasohan samtang anaa sa katungdanan, gawas sa pipila nga piho nga mga kaso.
Bisan pa, ang mga eksperto sa ligal nabahin kung kini magamit usab sa mga kaso nga gipadayon sa wala pa mapili ang usa ka presidente.
Gitataw usab sa National Court Administration nga ang mga maghuhukom sa tagsa-tagsa ka mga korte ang magdesisyon kung ipadayon ba o ipaubos ang kaso batok kang SoKor President Lee.
Ingon man nga mahimo kining dad-on sa Constitutional Court aron susihon kung nakalapas ba kini sa Konstitusyon sa nasud.
Sa pagkakaron, wala pay komento ang kampo ni Lee sa desisyon sa korte.
