Gipahayag ni US President Donald Trump nga gitapos na sa Estados Unidos ang gubat batok sa Iran gahapong adlawa, human gipaniguro nga nagkasabot ang duha ka habig sa usa ka lig-on nga “memorandum of understanding” aron hingpit nga maundang ang panagsumpaki.
Gihimo ni Trump ang maong pamahayag atol sa usa ka telerally alang sa pagsuporta kang Georgia Lt. Governor Burt Jones, nga kasamtangang nagpapili isip gobernador.
Matod sa pangulo sa Amerika, pormal nga miuyon ang Iran nga dili na magbaton og nuclear weapon, usa sa mga nag-unang kondisyon nga iyang gipugos ug maoy pinaka-tumong sa ilang operasyon.
Ang maong pahayag miguwas sunod sa pagkansela sa US sa mga gikatakda na unta nga airstrike sa Iran gahapon sa buntag, diin gihimo ang pagkansela human gipaila sa White House nga naplantsa na ang kasabutan, bisan pa man wala pa gidetalye ang kinatibuk-ang mga kondisyon niini.
Bisan pa niana, daw lahi ang baroganan sa habig sa Iran tungod kay matod sa tigpamaba sa ilang Foreign Ministry, wala pa silay pinal nga desisyon kalabot sa bisan unsang kasabutan ug ang mga nanggawas nga taho giisip pa lamang nga mga espekulasyon.
