Gikumpirmar ni US President Donald Trump nga gatusan ka mga target sa Iran ang naigo sa miaging 36 ka oras sukad sa paglusad sa “Operation Epic Fury.”
Sa video nga gipaambit ni Trump, gihulagway niya ang pag-atake isip “pinakadako, pinakakomplikado ug pinakagrabe nga mga opensiba sa militar nga nakita sa kalibutan.”
Sumala ni Trump, lakip sa mga target nga naigo mao ang mga pasilidad sa Revolutionary Guards ug Iranian Air Defense Systems.
Gikumpirmar usab ni Trump nga ang Supreme Leader sa Iran nga si Ayatollah Khamenei, kinsa giakusahan sa US President nga responsable sa pagpatay sa liboan ka mga inosenteng indibidwal sa daghang mga nasud, napatay na.
Gipahibalo usab ni Trump nga ang tibuok military command sa Iran naguba na, diin kadaghanan kanila gikataho nga gusto nga mosurender aron maluwas ang ilang kinabuhi.
Nagpasidaan usab si Trump nga ang mga kaswalti sa US mahimong madungagan samtang nagpadayon sila sa ilang mga operasyon sa kombat hangtod nga makab-ot ang tanan nilang mga katuyoan.
Gikumpirmar usab ni Trump nga tulo ka miyembro sa US military service ang namatay sa pagbinayloay og bala.
Gisubli usab sa Presidente sa US nga ang mga long-range missile ug mga armas nukleyar sa rehimeng Iranian usa ka dakong hulga sa mga Amerikano, usa ka butang nga dili nila tugotan nga gamiton batok kanila ug sa ubang mga nasud.
Gipasigarbo usab ni Trump nga ang Amerika adunay labing gamhanang militar nga nakita sa kalibutan, nga walay makatupong, apan iyang giklaro nga gusto nila nga gamiton kini alang sa maayong katuyoan.
Gipadayon ni Trump nga ang ilang mga aksyon makatarunganon aron masiguro nga ang mga Amerikano dili mag-antos sa iyang gitawag nga “radikal, uhaw sa dugo ug teroristang rehimen” nga armado sa mga armas nukleyar.
Samtang, gibutyag usab ni Trump ang posible nga timeline o gidugayon sa nagpadayon nga panagbangi tali kanila ug sa Iran. Miingon siya nga ilang gitarget nga ipadayon ang pag-atake sulod sa upat ngadto sa lima ka semana o sobra sa usa ka bulan. Miingon siya nga dili kini lisud alang kanila tungod kay sila adunay daghang suplay sa mga bala nga gitipigan sa lainlaing mga nasud.
