Miinsister si US President Donald Trump nga kinahanglang maangkon sa Estados Unidos ang Greenland aron mapugngan ang Russia ug China sa pagbuhat niini.
Gipasiugda sa Presidente sa US ang depensa sa Greenland ug miingon nga ilang buhaton kini sa bisan unsang paagi nga gikinahanglan.
Bag-ohay lang gipahibalo sa White House nga ang administrasyong Trump nagkonsiderar sa “pagpalit” sa Greenland, nga kontrolado sa Denmark isip usa ka autonomous territory, apan wala isalikway ang opsyon sa pag-annex niini pinaagi sa kusog.
Bisan pa, ang Denmark ug Greenland susamang miinsistir nga ang teritoryo dili “gibaligya.”
Nagpasidaan usab ang Denmark nga kung ang aksyong militar ilunsad batok sa ilang nasud, kini magsenyas sa katapusan sa alyansa sa depensa nga North Atlantic Treaty Organization (NATO), diin ang US ug Denmark parehong miyembro.
Balik-balik nga giingon ni Trump nga ang lokasyon sa Greenland importante sa nasudnong seguridad sa Amerika, diin kini giingong gilibutan sa mga barko sa China ug Russia sa tanang palibot, apan walay igo nga ebidensya alang niini nga alegasyon ni Trump.
Ang Greenland nahimutang usab taliwala sa North America ug sa Arctic, busa kini usa ka maayong lokasyon alang sa mga early warning system kung adunay mga pag-atake sa missile ug aron mabantayan ang mga barkong pandagat nga naglibot sa rehiyon.
Ubos sa kasamtangang kasabutan tali sa Estados Unidos ug Denmark, ang US adunay gahum sa pagdala og daghang mga tropa sa Greenland kung gusto niini.
Sa usa ka pahayag niadtong Biyernes sa gabii, ang mga lider sa partido sa Greenland, uban sa oposisyon, misubli sa ilang pagsupak sa pagka-ilalom sa kontrol sa Amerika ug mipilit nga ang kaugmaon sa Greenland kinahanglan nga desisyonan sa mga taga-Greenland.
