Gipasigarbo ni US President Donald Trump nga nihuyang na ang Iran human sa padayon nga mga pag-atake sa militar sa Amerika.
Matod sa US leader, sukad gilusad sa ilang pwersa ang Operation: Epic Fury, daghang mga military facility, defense ug strategic targets sa Iran ang ilang naguba pinaagi sa airstrikes ug missile attacks.
Giingon ni Trump nga ang operasyon kabahin sa mas dako nga kampanya sa militar aron pahuyangon ang kapasidad sa Iran sa pagdepensa ug pag-atake, ilabi na ang ilang mga base militar ug mga lugar nga giingong gigamit sa pagplano sa mga military operation.
Bisan pa sa dakong kadaot nga natala sa Iran, gipahayag ni Trump nga magpadayon gihapon ang ilang mga pag-atake aron masiguro nga mapugngan ang bisan unsang hulga batok sa interes sa Estados Unidos ug sa ilang mga kaalyado sa rehiyon.
Dugang pa niya, wala pa mahuman ang operasyon, ug nagpaabot ang US nga mohimo pa og daghang sunod-sunod nga mga pag-atake sa umaabot nga mga adlaw hangtod makab-ot ang ilang mga tumong militar.
Sa kasamtangan, wala pa’y opisyal nga detalyadong pahayag gikan sa gobyerno sa Iran mahitungod sa gidak-on sa kadaot nga nahitabo sa ilang mga military facility.
