Subling nagpagawas og laing hulga si U.S. President Donald Trump og klaro nga pasidaan sa Iran samtang nagkagrabe ang tensyon sa pag-abli sa Strait of Hormuz.
Sa usa ka post sa Truth Social niadtong Martes, si Trump miingon nga usa ka dakong katalagman ang mahimong mahitabo kung dili makab-ot ang usa ka temporaryo nga kasabutan.
Matud ni Trump nga usa ka tibuok sibilisasyon ang mamatay ug dili na makabangon pag-usab. Dugang pa niini, dili niya gusto mahitabo apan lagmit kini nga mapugos.
Hinuon naglaum si Trump nga ang usa ka posible nga pagbag-o sa pamunoan sa Iran makahatag og positibo nga mga resulta.
Gihatagan usab ni Trump ang gobyerno sa Iran hangtod sa alas 8 sa gabii (Eastern Time) aron mouyon sa usa ka ceasefire, nga maglakip sa pag-abli sa Strait of Hormuz.
Niadtong Marso 21, 2026, unang gihulga ni Trump nga atakehon ug gub-on ang mga planta sa kuryente sa Iran kung ang giingon nga koridor dili maablihan sulod sa 48 oras.
Bisan pa, duha ka adlaw ang milabay, miingon siya nga ang mga panagsulti tali sa duha ka nasud “produktibo” ug nga temporaryo niyang gilangan ang giplano nga pag-atake sulod sa lima ka adlaw.
Sukad sa Marso 27, gilangan niya pag-usab ang plano sulod sa 10 ka adlaw, giingong sa hangyo sa gobyerno sa Iran, nga nagtakda og bag-ong deadline nga Abril 6, 2026.
Samtang nagkaduol ang maong petsa, gipasidaan pag-usab ni Trump niadtong Biyernes nga ang Iran adunay “48 ka oras” sa dili pa buhian ang “all hell.”
Sa laing post niadtong Domingo, gisubli niya ang hulga, nga nagtumong sa Martes nga “Power Plant Day” ug “Bridge Day,” nga iyang giklaro sa ulahi nga mahitabo sa alas 8 sa gabii sa Eastern Time.
Ang Strait of Hormuz usa sa pinakaimportanteng ruta sa lana sa kalibutan, busa ang bisan unsang pagsira o pagkabalda didto mahimong adunay dakong epekto sa ekonomiya ug seguridad sa kalibutan.
Sa pagkakaron, ang Iran wala pa opisyal nga mitubag sa bag-ong ultimatum sa Amerika.
