Gipahibalo sa Brave 1, usa ka state- backed defense investment group sa Ukraine, nga tugutan ang mga langyaw nga kompanya sa armas nga sulayan ang ilang labing bag-o nga teknolohiya sa front line sa gubat batok sa Russia ubos sa programa nga “Test in Ukraine.”
Ubos sa naasoy nga scheme, ang mga kompanya magpadala og mga hinagiban sa Ukraine, maghatag og online training ug huwaton ang feedback nga gikan sa mga sundalo nga mogamit niini sa panagsangka.
Matod ni Artem Moroz, head sa investor relations sa Brave1, ang interes sa programa taas, apan wala pa niya hinganli ang mga piho nga kompanya nga nahilambigit o mga detalye bahin sa posible nga gasto.
Ang programa nagtumong sa pagpadali sa pagkadiskobre sa epektibo nga teknolohiya sa gubat sa Russia, samtang nagtabang sa mga langyaw nga kompanya nga makita kung hain sa ilang mga produkto ang aktuwal nga nagtrabaho sa aktuwal nga combat conditions.
Lakip sa mga prayoridad sa Ukraine alang sa pagsulay mao ang mga advanced air defense system sama sa drone interceptors, AI-guided nga mga hinagiban, gliding bomb, unmanned water system, electronic warfare tools, ug advanced fire control systems para sa mas tukma nga artilerya.
Naglaum ang Kyiv nga magtukod usa ka labi ka lig-on nga industriya sa depensa, sa tabang sa langyaw nga pagpangulo, aron mapugngan ang labi ka kusgan nga pwersa sa kaaway.
