Nisaka ngadto sa 3.8% ang unemployment rate o gidaghanon sa mga walay trabaho sa Central Visayas niadtong tuig 2025 kung itandi sa 3.1% sa 2024, sumala sa Philippine Statistics Authority (PSA) 7. Tungod niini, misaka usab ang ihap sa mga walay trabaho sa rehiyon ngadto sa 115,000 gikan sa 94,000 sa miaging tuig, ug kini basi sa datos nga gipagwas sa PSA-7 niadtong Mayo 21, 2026, isip kabahin sa ilang Annual Labor Force Survey.
Natala sa Dakbayan sa Lapu-Lapu ang pinakataas nga unemployment rate sa tibuok rehiyon ug mga highly urbanized nga syudad nga niabot sa 5.3%, samtang ang Dakbayan sa Mandaue usab ang nakakuha sa pinakamubo nga anaa lang sa 2.8%. Ang mga probinsya sa Bohol ug Sugbo, walay labot ang mga highly urbanized cities, parehong nakatala og 3.6% nga unemployment rate, nga nagpabiling ubos sa regional average.
Mi us-os usab ang ihap sa mga indibidwal nga adunay trabaho sa Central Visayas ngadto sa 2.93 milyon sa 2025 gikan sa 2.95 milyon sa 2024. Kini ang hinungdan nga miuswag paubos ang kinatibuk-ang employment rate sa rehiyon ngadto sa 96.2% gikan sa 96.9%. Sa mga highly urbanized cities, ang Dakbayan sa Mandaue ang nag-una sa labing taas nga employment rate nga anaa sa 97.2%, samtang ang Dakbayan sa Lapu-Lapu ang pinakagamay nga nakatala og 94.7%.
Nagpabilin gihapon nga pinakadakong tinubdan sa trabaho sa rehiyon ang services sector nga naggunit sa 64.9% sa kinatibuk-ang trabahante, gisundan sa industriya nga adunay 19.5%, ug agrikultura nga anaa sa 15.7%. Sa mga subsector, ang wholesale ug retail trade, uban ang pag-repair sa mga sakyanan ug motor, ang naghatag sa pinakadakong bahin sa trabaho nga niabot sa 20.3%, gisundan sa agrikultura ug forestry sa 12.7%, ug construction sa 9.7%.
Bisan pa man niini, mi us-os ngadto sa 6.3% ang regional underemployment rate sa 2025 gikan sa 7% sa 2024. Nagpakita kini og gamay nga kalamboan sa kalidad sa trabaho bisan pa man sa pagsaka sa kinatibuk-ang ihap sa mga walay trabaho. Samtang ang mga underemployed mao kadtong mga indibidwal nga adunay trabaho apan kulang ang oras sa trabaho o dili haom ang ilang posisyon sa ilang nahuman nga kurso, abilidad, ug training.
Sa pikas bahin, mi us-os ngadto sa 63.9% gikan sa 64.7% ang labor force participation rate, o ang porsyento sa working-age population nga adunay trabaho o aktibong nangita og trabaho. Diin ang Dakbayan sa Lapu-Lapu ang nakakuha sa pinakataas nga participation rate nga anaa sa 67.3%, samtang ang Dakbayan sa Sugbo ang pinakamubo nga natala sa 60.1%.
