MINNESOTA, USA – Wala nagpasagad ang gobyerno sa Estados Unidos sa ilahang katawhan nga naapektohan niining coronavirus disease 2019 pandemic.
Gi-asuy ni US Bombo Correspondent Daniel Quindao Guden, nga ang tanang tawo sa Estados Unidos ang adunay health insurance ma-anaa may trabaho o wala, ingon man nga adunay gihatag ang gobyerno nga Unemployment Insurance (UI) alang sa mga trabahante nga wala naka-trabaho gumikan sa gipatuman nga quarantine subay na sa makamatay nga sakit.
Matud ni Guden nga ang mga apektado nga trabahante nga adunay kita nga 75,000 dollars paubos sa usa ka tuig ang makadawat ug 1,200 dollars nga UI, samtang ang kadtong pamilyado ang makadawat usab ug 500 dollars matag anak.
Hinuon, giklaro niini ang kadtong mga adunay kita nga 150,000 dollars sa usa ka tuig ang dili kwalipikado sa maong insurance, apan makadawat sa uban pang tabang sa gobyerno.
Samtang, gipahibalo usab ni Guden nga hugot ang pagpatuman sa quarantine sa Estados Unidos kung diin wala’y tugotan nga maglakaw-lakaw, gawas lang sa mga essential worker diin kinahanglan usab kini sila nga nakasul-ob ug mga Personal Protection Equipment (PPE).
Ang mga kompanya ang gimandoan sa gobyerno nga kinahanglan ang mga empleyado hugot nga gisunod ang 6 feet physical distancing, samtang kadtong adunay daghang tawo, mamahimo na lang ang pagpatuman ug ‘scheduling’ sa pagtrabaho.
Gidugang usab ni Guden nga lakip ang mga media sa Estados Unidos ang nagpahigayon na lang ug ‘broadcasting’ sa ilahang tagsa-tagsa ka mga panimalay.
