Mipahayag si US President Donald Trump niadtong Biyernes, Hunyo 27 nga siya nagtuo nga posible nga ang usa ka ceasefire sa panagbangi sa Gaza tali sa Israel ug mga militante sa Hamas nga gipaluyohan sa Iran maabot sulod sa usa ka semana.
Gibutyag kini ni Trump atol sa usa ka kalihokan sa Oval Office sa Congo-Rwanda Accord nga nag-ingon kini nga hingpit nang makab-ot ang usa ka ceasefire.
Dugang niini nga matod pa bag-ohay lang daw siya nakigsabot sa pipila ka mga opisyales nga nalambigit sa tinguha sa usa ka ceasefire tali sa Israel nga nangilog sa teritoryo sa Palestine nga giatbangan sa pwersang militar sa Hamas.
Samtang ang Hamas mipahayag nga andam kini nga buhian ang nahabilin nga mga bihag sa Gaza ubos sa bisan unsang kasabutan aron tapuson ang gubat, samtang ang Israel nag-ingon nga kini matapos lamang kung ang Hamas madis-armahan ug mabungkag.
Ang Hamas nagdumili sa pagtugyan sa ilang mga armas tungod sa kasaysayan sa pagdaog-daog sa Israel sa katawhang Palestino.
Ang gubat sa Gaza na-trigger sa dihang giatake sa mga militante nga gipangulohan sa Hamas ang Israel niadtong Oktubre 7, 2023, nga mipatay sa 1,200 ka tawo ug mikuha sa 251 ka mga hostage, sumala sa mga ihap sa Israel.
Ang Gaza health ministry nag-ingon nga ang pag-atake sa militar sa Israel pagkahuman sa Oktubre 7 nakapatay sa kapin sa 56,000 nga mga Palestino.
Ang pag-atake nagpahinabo usab og krisis sa kagutom, pagkawala sa panimalay sa tibuok populasyon sa Gaza ug nag-aghat sa mga akusasyon sa genocide sa International Court of Justice ug sa mga war crimes sa International Criminal Court nga padayong gipanghimakak sa Israel ang maong mga akusasyon.
