Nisang-at og balaodnon si Senador Francis Pangilinan nga magtukod og gipalapdan nga programa sa voucher alang sa mga estudyante sa pribadong eskwelahan gikan sa mga panimalay nga ubos ang kita ug middle-income households.
Diin ang Senate Bill No. 1841 o ang “Private Education Voucher Expansions (PEVE) Act” nagtumong sa pagpalapad sa sakop sa tabang pinansyal sa mga estudyante nga kabus gikan sa kindergarten hangtod sa senior high school nga napugos sa pag-eskwela sa mga pribadong eskwelahan tungod sa sobra nga kadaghan o kakulang sa duol nga mga pampublikong eskwelahan.
Ang balaodnon nagtinguha usab sa pag-usab o pagwagtang sa pipila ka mga probisyon sa Republic Act No. 8545 o ang Expanded Government Assistance to Students and Teachers in Private Education Act.
Samtang ang explanation note sa balaodnon nag-ingon nga ang voucher assistance ihatag sa mga estudyante gikan sa mga middle-income families—basi sa klasipikasyon sa Philippine Statistics Authority (PSA)—nga nagtungha sa mga pampublikong eskwelahan nga giila sa Department of Education (DepEd) nga nagdasok, o kadtong nagpuyo sa mga lugar nga walay duol nga mga pampublikong eskwelahan ug gusto nga magpalista sa mga pribadong eskwelahan.
Nakalatid usab sa balaodnon nga ang tabang sa mga pribadong eskwelahan nga moapil sa programa ibase sa mga sumbanan sa pagsiguro sa kalidad, lakip ang gilapdon sa geographic coverage ug ang gidaghanon sa mga estudyante nga narehistro.
Mahinumduman nga ang DepEd kaniadto naglunsad sa inisyatibo sa pag-abang sa klasehanan isip temporaryo nga solusyon sa sobra nga kahuot sa mga pampublikong eskwelahan samtang nagpadayon ang pagtukod og permanente nga mga klasehanan, lakip ang pag-ayo sa mga giabangan nga pasilidad sa mga lugar nga adunay problema sa pag-angkon og yuta aron mapalapdan ang kapasidad sa mga klasehanan.
