CEBU CITY-Pipila ka mga Sugboanon ug mga bisita ang natingala sa wala pagtambong ni VP Sara Duterte sa opening ceremony sa Palarong Pambansa 2024 diin mao’y usa sa mga giatangan sa kadaghanan nga makita pagbalik na mag-uban sila ni Presidente Bongbong Marcos Jr., human sa mga giingong nga nabuwag ang ilang tandem.
Gani, dayag nga gipaambit ni VP Sara sa iyang social media account ang mga pipila ka hulagway nga nagpakita nga anaa kini sa dakbayan sa Sugbo.
Sama nalang sa pagduaw niini sa Basilica Minore Del Sto. Niño de Cebu gahapong adlawa sa buntag, Hulyo 9, 2024.
Ingon man nga daghan ang naglaum nga makit-an kini sa Cebu City Sports Center apan, daghan ang nakapangutana nganong wala kini sa kiliran sa Presidente atol sa pag-abli sa Palarong Pambansa 2024.
Apan, natubag ra dayon kini human sa mga mikatap nga mga litrato sa Bise Presidente nga anaa kini mibisita sa Cebu City Medical Center diin ang mga atleta, trainor ug coaches nga wala makatambong sa Opening Ceremony ang anaa sa maong tambalanan.
Nasayran nga gikan sa nagkadaiyang rehiyon ang na-admit sa hospital tungod sa lain-laing mga nasinati. Ingon man nga pipila sa ilaha kay gisayangan nga wala makatambong.
Hinungdan nga atol sa Opening Ceremony wala ang presensya ni Inday Sara tungod mas gipili niini nga kumustahon ang kahimtang sa mga delegado nga nalandig sa tambalanan.
