Gikatahong wala makatan-aw sa ikatulong State of the Nation Address ni Presidente Ferdinand Marcos Jr., si Bise Presidente Sara Duterte.
Sa giluwatang pamahayag sa Office of the Vice President, kini tungod kay anaa sa Bohol ang bise presidente aron pagpakita sa iyang pahasubo ngadto sa mga Boholano tungod sa pagtaliwan sa ilang Bise Gobernador nga si Dionisio Victor Balite ug pagsaulog sa Bohol Day.
Gawas niini, gusto usab ni Sara Duterte nga dasigon ang katawhan sa nahisgutang lugar sa pagkasuspenso sa ilang mga napiling lokal nga opisyal.
Matod niya usa kini ka maayong kahigayonan alang sa Bise Presidente sa paghatag og mensahe sa paglaom.
Usa ka mensahe nga nagpahinumdom nga ang Dios nagbantay kanato, ug pinaagi sa kooperasyon ug paningkamot sila makahimo pag-usab sa nasud.
Kung kahinumdoman, unang gianunsyo ni VP Sara nga dili siya motambong sa SONA ug nag-designate sa iyang kaugalingon isip ‘designated survivor’ nga gihatagan niya og katin-awan nga dili kini hulga.
