CEBU – Nanghinaut ang kadagkuan sa Department of Health (DOH) nga andam ang tanang ahensya sa pagmontar sa mga updated measures, ingon man ang nagkadaiyang pasilidad, kung ugaling adunay pagsaka sa kaso sa COVID-19 sa nasud.
Apan malaumon si Dr. Mary Jean Loreche, ang tigpamaba sa Visayas Vaccination Operations Center (VVOC), nga bisan pa man sa mga panagtapok gumikan sa eleksyon, dako sa gihapon ang posibilidad nga wala misaka ang kaso sa makamatay nga kagaw sa Pilipinas, gumikan na usab sa ka-epektibo sa mga bakuna nga gipang-gamit.
Hinuon, mipahimangno kini nga dili angayan nga magkumpyansa ang katawhan, hayan mas maayo nga andam ang tanan, ilabi na ang mga ahensya nga gisangonan sa COVID-19 response.
Subay niini, giawhag ni Dr. Loreche ang mga wala pa makapabakuna nga magpabakuna na, samtang kadtong mga naturokan na ug duha ka doses, angayan na nga magpa-booster shot, ingon man nga ipadayon ang pagsul-ob ug face mask, arun nga malikayan ang pagtinakdanay sa COVID-19.
