CEBU – Pormal nang gi-turnover ang 100 units nga medium-rise building nga gitawag ug “Walk Up Sugbo-1” sa Cebu City Government, diin nahimutang sa Barangay Lorega, San Miguel.
Ang maong aktibidad ang gitambongan ug dagko nga mga opisyal nga gilangkoban nila ni Cebu City Mayor Mike Rama, Vice Mayor-elect Raymund Garcia, Cebu City Councilor ug Committee on Infrastructure chairman Gerry Guardo, Department of Human and Settlements and Urban Development Sec. Eduardo Del Rosario, Cebu Landmaster President/CEO Jose Soberano III, ingon man si Barangay Lorega Kapitan Fritz Herrera.
Katuyoan sa maong Public-Private-Partnership (PPP) ang paghatag sa gatusan ka mga informal settlers ug luwas ingon man malinawon nga lugar nga ilahang kapuy-an.
Nasayran nga 60% sa mga beneficiaries kay gikan sa Barangay Lorega.
Samtang, gikalipay ug gipasigarbo ni Mayor Rama ang naasoy nga pag-turnover sa P115 million medium rise building.
Gani, buot pa sa mayor nga adunay laing kompanya nga maka-donate sa syudad ug high-rise building alang sa mga informal settlers.
Gipahibalo usab niini nga aduna na’y listahan ang syudad sa mga informal settlers nga mahimong makapuyo sa naasoy nga building.
